Авторларға арналған ережелер
Құрметті авторлар!
«JETE – Journal of Philosophy, Religious and Cultural Studies» журналының редакциялық алқасы екі түрдегі түпнұсқа авторлық қолжазбаларды баспаға қабылдайды: ғылыми мақала және ғылыми шолу. Сонымен қатар, «Ғылыми дәптер» айдарында ғылыми ескертпелер (ғылыми іс-шараларға шолу, түпнұсқа мәтіндерді қазақ тіліне аудару, сараптамалық сұхбаттар және т.б.) қабылданады.
JETE журналының сайтында мақала тіркелген кезде автордың метадеректерін үш тілде (мақала атауы, аннотация, түйінді сөздер, авторлардың аты-жөні, жұмыс орны, электрондық пошта мекенжайлары, ORCID) толтыру міндетті шарт болып табылады.
JETE сайтына жіберу кезінде қосымша хат және екі нұсқадағы қолжазба – толық мәтін және анонимдендірілген (метадеректерсіз) нұсқа ұсынылуы қажет, себебі қосарлы «соқыр» рецензия жүргізу үшін анонимді мәтін қажет. Файлдар мақала атауының алғашқы 4 сөзімен аталады.
Мақаланы жариялау шарттары:
- Бірлескен авторлар ретінде зерттеу жұмысына, оның тұжырымдамасына, дизайнына, орындалуына немесе түсіндірілуіне елеулі үлес қосқан тұлғалар көрсетілуі тиіс. Авторлыққа жеткіліксіз үлес қосқан тұлғалар «Алғыс» бөлімінде олардың еңбегі көрсетіліп берілуі мүмкін.
- Мақалада зерттеу мақсаты мен міндеттері, негізгі нәтижелер мен қорытындылар көрсетілуі, өзектілігі мен жаңашылдығы болуы тиіс.
- Жариялануға ұсынылған мақала бұрын еш жерде жарияланбаған және басқа басылымға ұсынылмаған болуы тиіс.
- Ұсынылған мақала журнал талаптарына толық сәйкес келуі қажет.
- Жариялау тілі: қазақ, ағылшын, орыс.
Рәсімдеу талаптары:
- Бірінші бетте көрсетіледі: мақала түрі (ғылыми мақала, ғылыми шолу немесе ғылыми ескертпе); МРНТИ (Қаріп – Times New Roman, өлшемі – 12 pt, қалың қаріп, сол жақ шеті бойынша туралау, шегініссіз).
- Мақаланың негізгі метадеректері (мақала атауы, автордың аты-жөні және жұмыс орны, аннотация, түйінді сөздер) алдымен ағылшын, кейін қазақ және орыс тілдерінде беріледі; автор-корреспонденттің электрондық поштасы көрсетіледі.
- Мақала атауы (Қаріп – Times New Roman, өлшемі – 14 pt, БАС ӘРІПТЕРМЕН).
- Автордың аты (кіші әріптермен) және тегі (БАС ӘРІПТЕРМЕН) мақала атауынан кейін бірінші бетте көрсетіледі (Қаріп – Times New Roman, өлшемі – 14 pt).
- Әріптік белгілерді пайдалана отырып, жұмыс немесе оқу орны, қала, ел көрсетіледі (Қаріп – Times New Roman, курсив, өлшемі – 12 pt).
- Автор-корреспонденттің электрондық поштасы (Қаріп – Times New Roman, өлшемі – 12 pt).
- Аннотация (кемінде 150-200 сөз). Аннотация мақала мазмұнын қайталамауы, жұмыс мәтініне және әдебиеттер тізіміне сілтемелер болмауы, мақаланың ерекшеліктері, спецификасы мен жаңашылдығын, автордың (авторлардың) үлесін, жаңалықтары мен қорытындыларын көрсетуі тиіс (Қаріп – Times New Roman, өлшемі – 12 pt, енінен туралау, 1 см шегініс).
- Түйінді сөздер. Мақаланы іздеу жүйелерінде индекстеу үшін 7-10 түйінді сөздер көрсетілуі тиіс. Түйінді сөздер нүктелі үтірмен бөлінеді (Қаріп – Times New Roman, өлшемі – 12 pt, енінен туралау, 1 см шегініс).
- Мәтіндік редактор параметрлері: барлық жағынан 2 см өрістер; енінен туралау; қаріп – Times New Roman, өлшемі – 14 pt; жоларалық интервал – 1; абзац шегінісі – 1 см; бет бағыты – кітапша. Толық мәтіннің көлемі: кемінде 16 бет (1 баспа бет).
- Кестелер мен суреттер мәтінде реттік нөмірмен орналастырылады. Атаулары ортасына тураланып, шегініссіз жазылады. Кестелер мен суреттерге сілтемелер дөңгелек жақшаларда беріледі, суреттегі объектінің орны курсивпен белгіленеді: (сур. 1, 2;). Суреттер мен кестелердің көлемі мақала көлемінің 1/3 бөлігінен аспауы тиіс.
- Мәтіндегі әдебиеттер тізіміндегі тиісті дереккөзге сілтемелер дөңгелек жақшаларда, жұмыстың бірінші авторы, жарияланған жылы, бет нөмірі көрсетіліп рәсімделеді, мысалы: (Мұқашев, 1989: 45) немесе (Әбділдин, 2019); Егер 2 немесе одан да көп автор болса: а) (Мұқашев және т.б., 2025: 45); б) (Әбділдин, Орынбеков, 1989: 45); Егер тікелей сілтеме болмаса: (Қабдуғалиев, 2024).
- Сілтемелер міндетті түрде соңғы бес жылдағы ғылыми еңбектерді қамтуы тиіс (кемінде бес).
- Мақала мәтінінде архивке сілтемелер дөңгелек жақшаларда беріледі, алғашқы аталғанда толық жазылып, кейін қысқартылған нұсқасы пайдаланылады – мысалы: (Қазақстан Республикасы Президентінің Архиві (бұдан әрі ҚР ПА) Ф. 141. Оп. 17. Д. 2356. Б. 12.)
- Авторлық мақалаларға сілтемелер жалпы сілтемелердің 20-25%-ынан аспауы тиіс.
- Әдебиеттер тізімі нөмірленбестен, екі нұсқада беріледі: пайдаланылған әдебиеттер тізімі автордың тегі мен инициалдары, жұмыстың атауы, орны, баспасы, жылы, беттері көрсетіліп, түпнұсқа тілінде алфавиттік тәртіппен; латын транслитерациясында (https://translit.ru). Егер сілтемелер ағылшын тілінде болса, транслитерация қажет емес (Қаріп – Times New Roman, өлшемі – 12 pt, 1 см шегініс, енінен туралау).
- Қосымша метадеректер бөлімі:
- Қажет болған жағдайда алғыс білдіру;
- Қажет болған жағдайда қаржыландыруды көрсету;
- Авторлардың үлесі мен мүдделер қақтығысын міндетті түрде көрсету;
- Авторлар туралы мәліметтерді үш тілде – қазақ, ағылшын және орыс тілдерінде көрсету (ғылыми дәрежесі, ғылыми атағы, жұмыс орны, мекенжайы, E-mail, ORCID).
